10. mar. 2010
Ráðuneyti svarar fyrirspurn um gengislán
Talsmaður neytenda hefur fengið svar við fyrirspurn til efnahags- og viðskiptaráðuneytis um hvort aflað hafi verið lögfræðiálits um (ó)lögmæti gengisbundinna lána. Hann er bundinn þagnarskyldu um atriði sem fram koma í minnisblaði um málið.
Efnahags- og viðskiptaráðuneytið hefur eftir nokkrar óformlegar ítrekanir brugðist við bréflegri fyrirspurn talsmanns neytenda frá í október sl. þar sem m.a. var spurt hvort aflað hefði verið lögfræðiálits um lögmæti gengistryggðra lána. Óskað var eftir afriti af því áliti ef til væri. Bréfinu fylgdi minnisblað um lánveitingar í erlendri mynt, dags. 9. júní 2009.
Óheimilt að skýra frá inntaki minnisblaðs
Þar sem minnisblaðið er ritað til eigin afnota ráðuneytis eru efnahags- og viðskiptaráðuneytið og talsmaður neytenda á einu máli um að hann sé bundinn þagnarskyldu um inntak minnisblaðsins samkvæmt lögum um embættið, sbr. upplýsingalög.
Talsmanni neytenda þykir að greina frá þessu jákvæða svari enda var greint frá fyrirspurn hans á sama vettvangi.
[* Aths. TN 17.8.'10: Hinn 10. ágúst sl. birti ráðuneytið umrætt minnisblað sem finna má sem PDF-skjal í fréttatilkynningu ráðuneytisins þann dag.]
Til baka
Fréttasafn
Heimilt er að birta merki talsmanns neytenda með fréttum af vef embættisins - www.tn.is - en óskað er eftir því að þeirrar heimildar sé getið.