26. okt. 2009
Réttur korthafa til endurgreiðslu flugferðar ef ferð er ekki farin
Neytendur eiga endurkröfurétt á greiðslukortafyrirtæki ef bú flugfélags er tekið til gjaldþrotaskipta áður en ferð er farin og annað flugfélag yfirtekur ekki ferðina.
Talsmaður neytenda hefur að gefnu tilefni og í samráði við helstu greiðslumiðlunarfyrirtæki á Íslandi tekið saman stutta lýsingu á því hvaða rétt korthafar, sem greiða fyrir flug með kreditkorti, hafa ef flugfélag verður gjaldþrota áður en ferðin er farin.
Ef greitt er með kreditkorti á neytandi endurkröfurétt ef flugfélag fer á hausinn og ferð er ekki farin
Að meginstefnu gildir eftirfarandi hjá Borgun vegna Master Card og Valitor vegna VISA.
Ef korthafi hefur greitt fyrir flugmiða með kreditkorti og viðkomandi flugfélag hættir starfsemi áður en ferð er farin á korthafi endurkröfurétt vegna þeirrar kortafærslu.
Ef annað flugfélag tekur á hinn bóginn við skuldbindingum gjaldþrota flugfélagsins og býður korthafa flug á sama tíma er endurkröfuréttur korthafa ekki fyrir hendi samkvæmt reglum félaganna.
90 daga fyrningarfrestur
Ef korthafi á rétt á endurkröfu ber honum samkvæmt innanhússreglum Borgunar og Valitor að hafa samband við útgefanda kortsins innan 90 daga frá dagsetningu flugsins og gera skriflega athugasemd við kortafærsluna. Kortafélagið gerir þá endurkröfu á seljandann eða færsluhirðinn og endurgreiðir upphæðina til korthafa.
Innanhússreglur byggðar á lögum
Nánar má lesa um reglur Borgunar á vef félagsins vegna Mastercard. Útgefendur VISA-korta, sem eru bankar og sparisjóðir, svo og þjónustuver Valitor veita allar nánari upplýsingar vegna endurkröfuréttar VISA-korta. Á heimasíðu banka og sparisjóða má finna viðskiptaskilmála VISA-kortanna.
Innanhússreglur greiðslukortafyrirtækjanna byggjast á óskráðum og skráðum reglum laga um neytendalán, lögum um húsgöngu- og fjarsölusamninga, lögum um fjármálafyrirtæki lögum og lögum um fjarsölu á fjármálaþjónustu.
Ferðatrygging
Auk þeirra reglna er ferðaskrifstofum og ferðaskipuleggjendum skylt að hafa tryggingu skv. V. kafla laga nr. 73/2005 um skipan ferðamála.
Til baka
Fréttasafn
Heimilt er að birta merki talsmanns neytenda með fréttum af vef embættisins - www.tn.is - en óskað er eftir því að þeirrar heimildar sé getið.